Mu gihe hasigaye imikino itatu ngo Shampiyona y’u Rwanda ya 2025/26 irangire, ibintu biri kugenda bifata indi ntera kuri APR FC itegerejweho kwegukana igikombe cya karindwi yikurikiranya, ariko icyo benshi batangiye kureba si igikombe gusa, ahubwo ni uburyo intsinzi y’iyi kipe ishobora guhindura imiterere y’ubukungu bw’umupira w’amaguru mu Rwanda.
Nyuma yo gutsinda AS Kigali ibitego 2-1 mu mukino wari ufite igisobanuro gikomeye, APR FC yisize hagati yayo na Rayon Sports amanota umunani, ibintu biyishyira hafi cyane yo kwisubiza igikombe cya Shampiyona. Inota rimwe gusa mu mikino itatu isigaye rirahagije ngo ibe yegukanye irushanwa.
Nubwo abafana benshi babifata nk’ibisanzwe kubera uburyo iyi kipe imaze imyaka yiharira ibikombe, inyuma y’iyo ntsinzi hari inkuru nini y’ubukungu iri kwiyubaka buhoro buhoro muri ruhago y’u Rwanda.
Iyo APR FC yegukanye igikombe, izahita ibona miliyoni 80 Frw nk’igihembo cya mbere cya Shampiyona, amafaranga atigeze atangwa mbere mu Rwanda. Ni impinduka ikomeye kuko imyaka ishize ikipe yatwaraga igikombe yahabwaga miliyoni 25 Frw gusa, ndetse andi makipe ntahabwe ibihembo bifatika.
Ibi byerekana ko FERWAFA n’abafatanyabikorwa ba Rwanda Premier League batangiye kureba ruhago nk’inganda yabyara amafaranga aho kuyifata nk’imikino gusa.
Iyo wongeyeho amafaranga azava muri CAF Champions League, aho amakipe yose atangira mu ijonjora rya mbere ahabwa ibihumbi 100$ angana na miliyoni zirenga 146 Frw, APR FC ishobora kwisanga yinjiye amafaranga arenga miliyoni 246 Frw mbere yo no kubara ay’abaterankunga, amafaranga ava ku kibuga ndetse n’igurishwa ry’ibicuruzwa byayo.
Kwamamaza kwa StarTimes, ubufatanye na Banki ya Kigali ndetse n’amasezerano mashya ari gutegurwa muri “BK Pro League”, byose biri gutuma amakipe atangira kubona ko umupira ushobora kwigira ubucuruzi bufite inyungu.
Gusa ikibazo gikomeye kiri kwibazwa ni niba aya mafaranga yose ashobora gufasha umupira w’u Rwanda muri rusange cyangwa niba azarushaho gushyira APR FC kure y’andi makipe.
Mu myaka irindwi ishize, APR FC yubatse ikipe ifite ubushobozi bwo kwiharira Shampiyona. Ibyo byafashije iyi kipe gukomeza kugira igikundiro no gukurura abakinnyi beza, ariko ku rundi ruhande bituma irushanwa ritangira kubura ihangana rikomeye.
Iyo ikipe imwe ifite ubushobozi bwo guhemba neza, kugura abakinnyi beza no gukina amarushanwa mpuzamahanga buri mwaka, andi makipe asigara akurikiye kure. Ni ikibazo kimaze igihe kigarukwaho n’abakunzi ba ruhago bavuga ko Shampiyona y’u Rwanda ikeneye uburyo bwatuma amafaranga agabanywa mu buryo bwafasha amakipe yose gukomera.
Ni yo mpamvu amakuru avuga ko Rwanda Premier League iri gutekereza uburyo amakipe yose yazajya ahabwa amafaranga runaka angana, andi akagabanywa hashingiwe ku musaruro, ashobora kuba intambwe nziza mu kubaka ihangana rirambye.
Ku rundi ruhande ariko, ibyo APR FC iri gukora ntibikwiye gusuzugurwa. Kuba ikipe yo mu Rwanda ishobora kugera ku rwego rwo kubona hafi miliyoni 250 Frw mu mwaka umwe biturutse ku musaruro wayo, ni ikimenyetso cy’uko ruhago nyarwanda iri kuva ku rwego rwo gukinira ishema gusa igatangira kugana ku rwego rw’ubucuruzi nyabwo.
Abafana ba APR FC bo batangiye kubara amasaha make abasigaje ngo bishimire igikombe cya karindwi yikurikiranya, ariko abayobozi b’umupira w’u Rwanda bo bafite indi nshingano ikomeye yo kureba uburyo aya mafaranga mashya ashobora kubaka Shampiyona irushaho gukomera aho kuyigira iy’ikipe imwe gusa.