Guverinoma ya Philippines yatangaje ibihe bidasanzwe mu rwego rw’ingufu, iba igihugu cya mbere ku Isi gifashe uwo mwanzuro nyuma y’ihungabana rikomeye ryatewe n’intambara iri mu Burasirazuba bwo Hagati.
Perezida w’iki gihugu, Ferdinand Marcos Jr, yashyize umukono ku iteka rya Perezida rigamije kurinda umutekano w’ingufu z’igihugu, avuga ko hari “akaga kegereje gashobora guhungabanya iboneka n’ituze by’ingufu”.
Icyemezo cya Philippines gifashwe mu gihe intambara ihanganishije Leta Zunze Ubumwe za Amerika na Israel ku ruhande rumwe, na Iran ku rundi ruhande, ikomeje guteza umutekano muke mu karere gafite uruhare rukomeye ku bukungu bw’Isi.
Iyo ntambara yanagize ingaruka zikomeye ku bwikorezi bwa peteroli, cyane cyane nyuma y’ifungwa n’igenzurwa rikomeye ry’inzira y’amazi ya Strait of Hormuz inyuramo igice kinini cya peteroli icuruzwa ku Isi.
Strait of Hormuz ifatwa nk’inzira y’ingenzi ku isoko ry’ingufu kuko amato menshi atwara peteroli ayinyuramo ajya ku migabane itandukanye. Iyo ihungabanye, ibihugu byinshi bihita bigira ibibazo by’ibura rya peteroli n’izamuka rikabije ry’ibiciro byayo.
Philippines iri mu bihugu byibasiwe cyane
Philippines ni kimwe mu bihugu bishingira cyane ku peteroli itumizwa hanze. Imibare igaragaza ko gitumiza hafi 98% bya peteroli gikoresha, kandi igice kinini kikava mu karere ko mu Kigobe cya Aziya y’Uburengerazuba.
Ibi bituma impinduka zose zibaye muri ako karere zigira ingaruka zihuse kandi zikomeye ku bukungu bw’igihugu ndetse no ku mibereho y’abaturage bacyo.
Ibiciro bya lisansi na mazutu byikubye kabiri
Kuva intambara yatangira ku wa 28 Gashyantare 2026, ibiciro by’ibikomoka kuri peteroli muri Philippines byazamutse ku kigero gikabije.
Raporo zitandukanye zigaragaza ko ibiciro bya lisansi na mazutu byikubye inshuro zirenga ebyiri, ibintu byateje izamuka ry’ibiciro by’ingendo, ibicuruzwa n’ibiribwa, ndetse bigira ingaruka ku musaruro w’inganda.
Abaturage benshi batangiye kugaragaza impungenge ku izamuka ry’ikiguzi cy’imibereho, cyane cyane abafite ubushobozi buke.
Leta yashyizeho ingamba zihutirwa
Iteka rya Perezida ryashyizweho rigamije gushyiraho ingamba zihutirwa zirimo kugenzura ikoreshwa ry’ingufu, kuzigama peteroli no gushaka amasoko mashya y’ibikomoka kuri peteroli.
Guverinoma yatangaje ko igiye gukorana bya hafi n’ibigo by’ingufu n’abikorera kugira ngo harebwe uko igihugu cyakomeza kubona ingufu zihagije bitabangamiye ubukungu.
Abasesenguzi mu by’ubukungu bavuga ko ihungabana ry’inzira z’ubwikorezi bwa peteroli rishobora gukomeza kuzamura ibiciro by’ingufu ku Isi hose.
Bemeza ko niba intambara ikomeje igihe kirekire, ibihugu byinshi bishobora kwisanga bifashe ingamba nk’iza Philippines hagamijwe kurinda ubukungu bwabyo.
 |
| Iteka rya Perezida ryashyizweho rigamije gushyiraho ingamba zihutirwa zirimo kugenzura ikoreshwa ry’ingufu, kuzigama peteroli no gushaka amasoko mashya y’ibikomoka kuri peteroli. |