Mu gihe uruganda rw’imyidagaduro ku Isi rukomeje kwiyongera no guhangana gukomeye, sosiyete ya Netflix yongeye gutangaza izamuka ry’ibiciro ku bafatabuguzi bayo, ibintu byahise bikurura impaka mu bakoresha uru rubuga rukunzwe cyane ku Isi.
Iri zamuka rishya ryatangiye gushyirwa mu bikorwa ku wa 26 Werurwe 2026 ku bafatabuguzi bashya, mu gihe abasanzwe bazagenda barimenyeshwa mbere y’igihe kugira ngo babashe gufata imyanzuro iboneye ku buryo bakomeza gukoresha iyi serivisi.
Netflix yatangaje ko gahunda yayo ihendutse irimo kwamamaza (plan with ads) yazamutse iva kuri 7,99$ igera kuri 8,99$ ku kwezi.
Gahunda isanzwe itarimo kwamamaza (standard plan) na yo yazamutseho 2$, iva kuri 17,99$ igera kuri 19,99$ buri kwezi, mu gihe gahunda yisumbuyeho (premium plan) yazamutseho 2$, igera kuri 26,99$ ku kwezi.
Ku bijyanye no kongeraho undi muntu utari mu rugo rumwe, Netflix na bwo yahinduye ibiciro. Gahunda irimo kwamamaza yagabanutseho gato iva kuri 7,99$ igera kuri 6,99$, mu gihe gahunda itarimo kwamamaza yazamutse iva kuri 8,99$ igera kuri 9,99$ ku kwezi.
Ibi bigaragaza ko Netflix iri kugerageza guhuza ibiciro n’uburyo butandukanye abakoresha serivisi bayo bayikoresha, cyane cyane mu rwego rwo kugenzura ikoreshwa rya konti zisangirwa.
Netflix yavuze ko iri zamuka ry’ibiciro rishingiye ku ishoramari rikomeje gushyirwa mu gukora ibihangano bishya by’umwimerere (original content), birimo filime n’uruhererekane rw’amafilime bikomeje gukundwa ku rwego mpuzamahanga.
Mu myaka ishize, Netflix yashoye miliyari nyinshi z’amadolari mu bikorwa by’imyidagaduro, hagamijwe gukomeza guha abakoresha ibintu bishya kandi bifite ireme.
Nanone iri zamuka rije mu gihe iri sosiyete iri mu irushanwa rikomeye n’izindi mbuga zitanga serivisi nk’izi, ari na byo biyihatira gukomeza kuzamura ireme rya serivisi itanga.
Ku bakoresha Netflix muri Afurika no mu Rwanda by’umwihariko, iri zamuka rishobora kugira ingaruka ku buryo bayikoresha.
Ibi biterwa n’uko ubushobozi bw’abakoresha Netflix butandukanye, cyane cyane mu bihugu bikiri mu nzira y’amajyambere aho amafaranga y’amahanga akomeza kugira agaciro kanini.
Nubwo ibiciro bikomeje kuzamuka, Netflix iracyari imwe mu mbuga zifite abafatabuguzi benshi ku Isi, bitewe n’ubwinshi bw’ibihangano itanga ndetse n’ikoranabuhanga ryorohereza abayikoresha.
Ariko kandi, iri zamuka rishobora gufungura amarembo ku zindi serivisi ziri kuzamuka, cyane cyane izitanga ibiciro biri hasi cyangwa zifite ibihangano byibanda ku baturage bo mu bice bitandukanye by’Isi.
Abasesenguzi mu by’ubukungu n’ikoranabuhanga bemeza ko Netflix ishobora gukomeza kuzamura ibiciro buhoro buhoro, bitewe n’uko ikomeza gushora imari nyinshi mu bikorwa byayo.
Ariko kandi, bizasaba ko ikomeza gutanga serivisi zifite agaciro gafatika ku bakoresha, kuko iyo ibiciro byiyongereye bidaherekejwe n’inyongera mu bwiza, bishobora gutuma bamwe mu bafatabuguzi bayivaho
Izamuka ry’ibiciro bya Netflix ni ikimenyetso cy’uko urwego rwa streaming rukomeje guhinduka no gukomera ku rwego mpuzamahanga. Ku bakoresha, bisaba gufata icyemezo gishingiye ku bushobozi n’inyungu babona muri iyi serivisi.
Ku rundi ruhande, ni isomo rikomeye ku masosiyete y’imyidagaduro yo muri Afurika, ko gushora imari mu bihangano by’umwimerere no kunoza serivisi bishobora gutuma na yo agira uruhare ku isoko mpuzamahanga.
 |
| Netflix yavuze ko iri zamuka ry’ibiciro rishingiye ku ishoramari rikomeje gushyirwa mu gukora ibihangano bishya by’umwimerere (original content) |