Perezida Paul Kagame yageze i Nairobi muri Kenya kuri uyu wa 11 Gicurasi 2026, aho yitabiriye inama mpuzamahanga ya ‘Africa Forward Summit’, iri guhuriza hamwe abakuru b’ibihugu, abashoramari, ibigo bikomeye n’impuguke ziganira ku hazaza h’umugabane wa Afurika n’imikoranire yawo n’u Bufaransa.
Ni inama iri kubera mu gihe Afurika iri gushaka uburyo bushya bwo kwigira mu bukungu, kongera ubushobozi bw’inganda no gukoresha ikoranabuhanga nk’intwaro yo kwihutisha iterambere.
Perezida Kagame yitabiriye iyi nama ayobowe n’abakuru b’ibihugu barimo Perezida wa Kenya, Dr William Samoei Ruto, na Perezida w’u Bufaransa Emmanuel Macron, mu gihe biteganyijwe ko izitabirwa n’abarenga 4000 barimo abayobozi bakuru, abikorera, abanyemari n’abahanga mu ikoranabuhanga.
Mu byo Perezida Kagame aza kwibandaho harimo ikiganiro kijyanye n’ikoreshwa ry’ubwenge buhangano (AI) mu guteza imbere Afurika, kimwe n’uruhare rw’inganda zitangiza ibidukikije ndetse n’ingufu zisukuye mu kuzamura ubukungu bw’umugabane.
Ni ingingo ziri gufata intera nini ku rwego mpuzamahanga, cyane cyane mu gihe ibihugu byinshi bya Afurika biri gushora imari mu ikoranabuhanga no gushaka kugabanya ingaruka z’imihindagurikire y’ikirere ku bukungu bwabyo.
Afurika iri gushaka ijwi rishya mu bukungu bw’Isi
Nubwo iyi nama igaragara nk’ihuriro rya dipolomasi hagati ya Afurika n’u Bufaransa, abasesenguzi bavuga ko iri no kuba uburyo bwo kongera gusobanura umubano mushya ushingiye ku nyungu z’ubukungu aho kuba ubufasha busanzwe.
Mu myaka yashize, Afurika yagiye ishyira imbere gahunda yo gukorana n’ibihugu by’i Burayi hashingiwe ku ishoramari, ikoranabuhanga no guhanga imirimo, aho kuguma mu murongo w’ubufatanye bushingiye gusa ku nkunga.
Kuba Perezida Kagame aza kuyobora ibiganiro ku bwenge buhangano bifite ubusobanuro bwihariye kuri Afurika. U Rwanda rumaze imyaka rwiyubaka nk’ikigo cy’ikoranabuhanga muri Afurika, rushora imari mu miyoborere ishingiye ku ikoranabuhanga, serivisi z’ikoranabuhanga ndetse no gutegura urubyiruko rujyana n’impinduka z’Isi ya digitale.
Ibi biha Kigali umwanya wo kwigaragaza nk’umwe mu mijyi ya Afurika ishobora kwakira ishoramari rishingiye kuri AI, ubukungu bwa digitale n’inganda zigezweho.
Kenya n'URwanda bikomeje kwigaragaza nk’ibigo by’ubucuruzi muri Afurika y’Iburasirazuba
Kuba iyi nama ibera i Nairobi na bwo bifite igisobanuro cya politiki n’ubukungu. Kenya iri mu bihugu bikomeje kwagura ubucuruzi bushingiye ku ikoranabuhanga, ubwikorezi n’imari, mu gihe u Rwanda na rwo rwubatse izina mu koroshya ishoramari no guteza imbere serivisi.
Abasesenguzi babona ko ibi bihugu byombi biri kugerageza kwerekana Afurika y’Iburasirazuba nk’akarere gafite amahirwe mashya y’ishoramari, cyane cyane mu rwego rw’ikoranabuhanga, ingufu zisukuye n’inganda zifite aho zihuriye no kubungabunga ibidukikije.
Ibi kandi bije mu gihe Afurika iri gushaka amafaranga yo gushyira mu bikorwa imishinga minini y’iterambere. Minisitiri w’Ububanyi n’Amahanga n’Ubutwererane, Amb Olivier Nduhungirehe, yavuze ko imwe mu ngingo nyamukuru iri kuganirwaho ari uburyo bwo kubona ubushobozi bwo gutera inkunga imishinga y’iterambere no gukomeza kwimakaza amahoro n’umutekano.
Ni ikibazo gikomeye kuko ibihugu byinshi bya Afurika bikomeje guhura n’umwenda munini, ibibazo by’umutekano ndetse n’ingaruka z’ubukungu zatewe n’intambara n’ihindagurika ry’isoko mpuzamahanga.
Inama ishobora gusiga Afurika n’u Bufaransa mu cyerekezo gishya
Mu myaka ya vuba, umubano hagati y’u Bufaransa n’ibihugu byinshi bya Afurika wagiye uhura n’ibibazo bishingiye ku mateka ya politiki, umutekano n’inyungu z’ubukungu. Gusa iyi nama iri gutegurwa nk’urubuga rwo kongera kubaka icyizere hagati y’impande zombi.
Ku ruhande rwa Afurika, icyitezwe ni uko ubufatanye bushya bwava mu magambo bukajya mu bikorwa bifatika birimo ishoramari, guhanga imirimo no korohereza urubyiruko kubona amahirwe mu bukungu bwa none.
Ku ruhande rw’u Bufaransa na rwo, Afurika ikomeje gufatwa nk’isoko rinini rifite urubyiruko rwinshi, umutungo kamere n’amahirwe y’ikoranabuhanga bishobora kugira uruhare mu bukungu bw’Isi mu myaka iri imbere.
Kuba Perezida Kagame ari mu bayobozi bitezweho gutanga umurongo kuri izi ngingo, bishimangira uburyo u Rwanda rukomeje kwiyubaka nk’igihugu gifite ijwi rikomeye mu biganiro bireba ahazaza h’iterambere rya Afurika.